BUTUAN CITY – Opisyal nang gibuksan kagahapong adlawa ang 29th Siargao International Surfing Cup 2025 (WSL QS6000) sa Municipal Gymnasium, didto sa lungsod sa General Luna, Siargao Islands, lalawigan sa Surigao del Norte. Sugdan ang formal competition karong adlawa ngadto na sa Oktubre 31 sa sikat nga Cloud 9 sa Barangay Catangnan, General Luna.
Mu-abot sa kinatibuk-ang 179 ka mga surfers gikan sa Japan, Korea, New Zealand, India, Australia, Brazil, France, Great Britain, Italy, United States of America, South Africa, Sweden, Taiwan ug Pilipinas ang mag-compete sa maong inilang surfing event.
Ang Australia maoy duna’y pinakadaghang delegasyon tungod sa ilang 62 ka mga surfers, nga gisundan sa Japan nga duna’y 53, Pilipinas-33 ug 15 sa India. Si Philippine Sports Commission Chairman Patrick Gregorio ang nagsilbing guest of honor samtang si Andrew Stark usab nga presidente sa World Surf League Asia Pacific, ang nagbukas sa maong seremonya.
Init usab nga gi-welcome nila Governor Robert Lyndon Barbers sa Surigao del Norte ug Mayor Johnson Sajulga sa General Luna ang mga surfers ug mga bisita.
Sa iyang pagpamulong, misaad si Philippine Sports Commission Chairman Patrick Gregorio nga suportado kini sa nasudnong kagamhanan aron himuon kining mas mas dako, mas maayo ug outstanding sa sports tourism event sa nasud.
Ang Siargao International Surfing Cup, usa sa longest-running ug pinaka-prestihiyusong surfing competitions sa Pilipinas nga padayong nag-promote sa Siargao isip surfing capital sa Pilipinas ug nag-unang international tourism destination.
