BUTUAN CITY – Shock apan gikalipay ni Bernard Clement Abellana, Regional Sports Coordinator sa Deped-Caraga, ang pagkuha pag-usab sa central office kaniya isip team manager sa delegasyon sa Pilipinas nga ipadala sa Singapore alang sa 9th ASEAN school games sunod bulan.
Sigon ni Abellana sa eksklusibong pakighinabi ning sibyahan, niadtong Mayo 25 niya nadawat ang memorandum nga nag-ingong siya ang napili isip team manager sa ipadalang delegasyon alang sa maong dula nga magsugod karung Hulyo 13 ngadto na sa Hulyo 21.
Gikahibulong niini ang pagkuha pag-usab sa iyang serbisyu. Nasayrang niadtong 6th ASEAN school games, siya ang nahimong team manager diin nabutang sa ika-upat nga puwesto ang Pilipinas gikan sa onse ka mga nasud.
Apan sa dihang dili na siya ang nagdumala sa maong delegasyon, nabutang ang nasud sa ika-walo nga puwesto sa niaging tuig. Pangagpas pa sa opisyal, gusto sa central office nga mo-angat pagbalik ang delegasyon sa Pilipinas sa maong padula hinungdang gikuha pag-usab ang iyang serbisyu.
Gibutyag usab ni Abellana nga ang magrepresentang athleta sa nasud, mao ang midaug sa Palarong Pambansa 2017 apan walay nakuhang gikan dinhe sa Butuan tungod kay ang host nga Singpore wala man gi-apil ang dulang wrestling ug archery, diin nagkampeon ang dakbayan.
Karung adlawa, muadtu sa kauluhan ang opisyal alang sa planning session isip pagpangandam sa maong dula diin apilan sa 211 ka athleta gikan sa Pilipinas. (Rolan Janea)
