BUTUAN CITY – Human na-irita, gisuspende gilayon og pipila ka minuto ni Senate Blue Ribbon Committee chairman Panfilo ‘Ping’ Lacson, ang ilang pagdungog dihang wala niini nagustuhan ang gi-isa nga prejudicial question ni kanhi chairman Rodante Marcoleta dihang gipangutana kini sa iyang katungod pagpagawas og opinyon kalabot sa nagpadayon pa nilang imbestigasyon.
Sa entrada ni Marcoleta, gipadayag niini nga nakataya sa ilang imbestigasyon ang intergridad, impartiality ug objectivity sa proceedings nga posibleng ma-apektuhan tungod sa iyang tubag sa interview sa usa ka TV host dihang gipangutana kung kinsa alang kaniya ang makonsiderang sulod sa Witness Protection Program tali sa mga Discaya ug kang Engr Brice Hernandez.
Dihang gipadayon pagbasa ni Marcoleta ang tubag ni Lacson nga mas mipabor kang Hernandez, dinhi na misaka ang tingog sa committee chair dayong butyag nga wala matud pa kini katungod nga kwestyunon ang iyang personal opinion nga gihimo matud pa niya gawas sa hearing sa ilang komite.
Apan dihang segundahan na unta siya ni Marcoleta nga dili niya kini angayang himuon tungod kay nagpadayon pa ang imbestigasyon, dinhi na na-usab ang facial expression ni Lacson dayong suspende sa pagdungog.
