BUTUAN CITY – Gimando na ni P/Chief Supt. Rolando Felix – regional director sa Police Regional Office-13 kon PRO-13 ngadto sa Surigao del Sur Police Provincial Office ang pagmugna gilayon sa Special Investigation Task Group kon SITG aron imbestigahan ang pagpusil-patay sa komentaristang si Christopher Iban Lozada – station manager sa Prime FM.
Sa eksklusibong interview sa Bombo Radyo Butuan, gibutyag ni P/Chief Insp. Rennel Serrano – information officer sa PRO-13, apil sa gipatutukan nilang imbestigahan sa hingtungdang police unit, ang mga naka-away niini ilabina ang mga na-subject sa iyang init nga mga komentaryo diha sa iyang radio program sa kahanginan.
Kini karon ang ilang gipasubay aron makabaton na sila og lead og mahan-ay na kung asa nga anggulo sila magsugod sa ilang imbestigasyon. Nasayran sa iyang inisyal nga gibadlong na sa iyang mga ka-ubanan sa buhat ang biktima tungod kay below the belt matud pa kini kung mangomentaryo sa mga tawong subject sa iyang isyu.
Apil sa himuong basehan sa imbestigasyon ang nadawat nga mga death threats sa biktima nga gipadala kaniya pinagi sa mga text messages ingon man ang mga narekober nga 22 ka basiyo sa AK47 og M16 armalite rifles.
Gihatagan na usab karon og hugot nga seguridad ang na-ospital nga live-in partner sa komentarista na si Honey Faith aron masegurong dili na kini madu-ulan pa sa mga responsable sa maong hitabo.
Nanawagan usab kini sa tanang mga mediamen nga mudangop gilayon sa pinakaduol nga police station og ipa-blotter ang madawat nilang hulga sa kinabuhi aron mahatagan sila og police escorts.
Gawas pa, higayong duna’y dautang mahitabo sa usa ka tigbalita, duna sila’y magamit nga reference og magamit nga lead sa pagsugod unya sa ilang imbestigasyon. (Beth Ruiz)
