BUTUAN CITY – Nagmugna na og Special Investigation Task Group kon SITG ang Surigao City Police Station aron mas mapalawman pa ang imbestigasyon kalabot sa pagpusil-patay kang Dinagat Islands provincial board member Wenefredo Olofernes.
Sigon ni PLCol. Randy Amaro – commander sa Surigao City Police Station, padayon ang ilang koordinasyon tali sa mga sakop sa Dinagat Islands Provincial Police Office aron ma-ilhan na ang riding-in-tandem suspects nga mitiro sa biktima dihang pa-uli na unta gikan nag-exercise sa parke sa Brgy. Luna, Surigao City.
Sa eksklusibong pakighinabi ning sibyahan, gibutyag sa opisyal nga mihimo na sila og re-enactment sa dapit nga nahitabuan aron ilang makuha ang saktong pwesto og distansya sa suspek ngadto sa biktima.
Padayon usab ang ilang pakig-alayon sa tag-iya sa ubang mga establisamiento aron makita ang CCTV footages nga posibleng mahimong dalan aron makabaton na sila og klarong lead sa maong insidente.
Gidugang ni Col. Amaro nga duna na sila’y mga persons of interest apan kinahanglan pa nilang palig-unon ang ilang identity pinaagi sa mga lig-ong ebidensya.
Giklaro usab niini nga pabilin pang anaa sa sien-mil pesos ang reward money alang niadtong makatudlo sa responsable sa kremin og mag-agad na lamang sila sa Dinagat Islands PPO kung ila kining dugangan alang sa daling pag-ila sa suspek og pagsikop niini.
Ibalhin na karong adlawa gikan sa Surigao City ngadto sa Dinagat Islands province ang patay’ng lawas sa gipatay sa opisyal aron didto na usab kini ihaya.
