BUTUAN CITY – Magpatuman og upat ka adlaw’ng special concern lockdown ang lokal nga kagamhanan sa Cabadbaran City, lalawigan sa Agusan del Norte sugod karong Enero 30 hangtud Pebrero 3 ning tuiga base na sa gipagawas nga Executive Order 002-2021 ni Mayor Jodi Chin Amante.
Sa eksklusbong pakighinabi sa Bombo Radyo Butuan, gipadayag ni Cabadbaran City government spokesperson Roselyn Exaure nga 15 ka mga barangay ang dili pasudlan partikular ang Brgy. Poblacion, Brgy. 1 hangtud 12 ingon man ang Kalibunan, Mabini ug Tolosa hinungdan nga ibalik og montar sa lokal nga kagamhanan ang ilang local control points partikular sa Brgy. Causwagan, Cumagascas, Mabini ug Calibunan.
Nakalatid usab sa kamanduan nga wala’y tugutang mamista sa maong siyudad karong Pebrero 2 alang sa ilang patron nga Nuestra Señora de Candelaria ug ipatuman pa ang liqour ban.
Ang mga manglabay lang sa maong siyudad, mu-agi gihapon sa basic protocols diha sa mga control points ug pangitaan sila ug valid ID adiser eskortan padulong sa border aron masigurong dili muhapit sa ilang siyudad.
Atol usab sa pista, wala’y tugutan nga mangimbitar ug pakan-on sulod sa balay sa mga maghanda, bisan pa man og sila taga-Cabadbaran ra usab samtang pwede usab nga mag-inom sulod sa balay apan dili na kinahanglang mangimbitar pa og bisita.
Samtang ang mga market vendors nga dili taga-ila, mamahimo gihapong maka-display sa ilang mga paninda basta duna lama’y ikapresentang mga dokumentong magpamatuod nga duna sila’y pwesto sa merkado o sa bisan unsang tindahan sulod sa maong siyudad.
