BUTUAN CITY – Gipatuman na sa City Transportation and Traffic Management Department kon CTTMD-Butuan ang 10 km/h nga speed limit sulod sa 500-meter radius gikan sa mga eskwelahan ug ospital, diin duna’y daghang mga pedestrian ug motorista.
Kini subay na sa Joint Memorandum Circular No. 2018-001 tali sa Department of Transportation; Department of Public Works and Highways ug Department of Interior and Local Government nga nagmando sa tanang LGUs nga magpatuman ug speed limit ordinances sa mga lokal nga kalsada, lakip na ang crowded streets sama sa palibot sa eskwelahan, merkado, ug simbahan.
Kini aron malikayan ang mga aksidente sa kadalanan ilabina nga pipila na ka insidente sa road crash nga natala duol sa mga eskwelahan, hospital, ug bisan pa man sa pedestrian lanes.
Usa sa mga pamaagi sa pagpatuman niini mao ang pagbutang og mga traffic signages nga nagpakita sa 10 km/h speed limit sa mga school zones, hospital areas, parking spaces, ug uban pang pedestrian-heavy nga lugar diin kinahanglan ang hinay ug matngon nga pag-drive.
