BUTUAN CITY – Gikwestyon ni Senate President Chiz Escudero ang mga magbabalaud nga nagkutay sa iyang pangalan ngadto sa mga palpak nga flood-control projects sa ilang lalawigan sa Sorsogon.
Kini human gibutyag ni Pangulong Ferdinand Marcos Jr ning mi-aging adlaw sa iyang press conference, ang mga proyektong maoy hinungdan sa palpak nga mga proyekto sa Department of Public Works and Highways nga nagkantidad og 550-bilyunes pisos.
Gipadayag sa pangulo nga wala siya’y alegasyon apan 15 matud pa ka mga contractors ang nakakuha sa maong pundo.
Sa iyang gipatawag usab nga press conference, gibutyag sa senador nga malisyuso ang post nga nagkutay sa iyang pangalan ngadto sa anumalusong mga flood-control projects sa ilang lalawigan sa Sorsogon dungan sa pagpasabot nga ang gitumbok sa maong artikulo, dili siya kondili ang iyang higalang contractor.
Giklaro sa Senate President nga ang nakuhang proyekto sa iyang higala, nagkantidad lang og 5.4-bilyunes pisos kansa wala ra mag-uno porsiento sa kinatibuk-ang pundo nga gipadayag sa pangulo.
Gikwestyon usab niini kung nganong ang maong porsiento lang sa pundo ang gitutukan ug dili ang pinakadakong 99-porsiento dungan sa pagklarong wala siya’y kabahinan sa nasangpit nga proyekto ilabina nga dili siya contractor.
Giklaro sa senate president nga malisyuso ang artikulo bisan og wala nakalatid nga duna siya’y gihimong dautan tungod kay anaa man ang pag-insinuate sa mga tawo ilabina nga gitayming gyod pagpagawas niini human nila nadesisyunan sa Senado ang pag-archive sa impeachment complaint batuk kang Vice President Sara Duterte.
Wala’y duha-duha nga gitumbok ni Escudero nga ang mga magbabalaud nga gusto gayod nga ma-impeach ang besi presidente ang nagkutay sa iyang pangalan sa nasangpit nga mga proyekto.
Mao matud pa kadtong mga magbabalaud nga na-igo sa iyang posisyon sa gibotaran nilang mga senador atol sa deliberasyon.
