BUTUAN CITY – Gipa-ilalom sa duha ka semanang lockdown ang Sangguniang Panlungsod kon SP building ning siyudad sa Butuan human nga upat ka mga konsehal ug pito ka mga staff niini ang nagpositibo sa coronavirus disease 2019 kon COVID-19.
Gilayon usab nga mipa-ilalom sa pag-kwarantina ang maong mga konsehal ug staff human nagpositibo ang ilang swab sample sa R-PCR test.
Nagnegatibo usab hinuon ang swab test si Vice Mayor Jose ‘Joeboy’ Aquino II human na-expose sa mga nagpositibong mga konsehal.
Samtang sa ekslusibong pakighinabi sa Bombo Radyo Butuan, gipadayag ni Butuan City government spokesperson Michiko de Jesus, gisugdan na nila karong semanaha ang virtual meetings human nga daw wala mi-epekto ang face-to-face meeting ning mi-aging semana taliwa nga ilang gi-obserba ang physical distancing.
Alayon niini, iyang gi-awhag ang tanan nga pabiling sundon ang minimum health protocols ug likayan ang tapok-tapok aron masigurong dili mukaylap ang COVID-19.
Gidasig usab matud pa sa city government ang pag-practice na sa virtual meeting samtang anaa pa ang taas nga hulga sa COVID-19.
Mihangyo usab siya sa tanan nga muduol na lang sa ilang tagsa-tagsa ka Barangay Health Emergency Response Team kon BHERT higayong masayran nga na-expose sila sa mga tawong positibo sa makamatay nga coronavirus, aron malikayan nga masusama kita sa kauluhang Manila nga grabe kataas ang kaso.
