BUTUAN CITY – Niani ug nagkadaiyang reaksyon ang post sa veteran broadcaster nga si Karen Davila mahitungod sa aksidenteng nadangatan sa iyang anak, ug ang kakulang matod pa sa health facilities sa Siargao Island, Surigao del Norte.
Nabahin ang komento sa mga active users online tungod sa detalyadong reaksyon sa veteran broadcaster sa kasinatian sa iyang pamilya sa pagbisita nila sa isla.
Komento sa usa ka netizen, dili angayan nga maguba ang imahe sa isla tungod lang sa nahitabong aksidente, ug ang matag turistang mobisita sa Siargao dunay tulobagon sa kung unsay mahitabo sa ilang pagsuroy suroy sa Isla.
Samtang gitawag sa laing nagkomento nga “OA” o overacting ang nahimong reaksyon matod pa ni Davila.
Dunay pipila nga gipanalipdan ang broadcast journalist tungod nasuta usab nila ang kakuwangon sa isla hilabina nga nagkadaghan na ang mga turista nga mobisita.
Nag trending sa social media ang Facebook post ni Davila niadtong nakalabay’ng adlaw tungod samdan na ang dughan sa iyang anak dihang nihaw-as sa tubig human ang surfing lesson.
Nasayran sa broadcaster nga kuwang ang medical ug health facilities sa isla, ingon man nga wala usab lisensya ang pipila ka mga surfing instructors.
Sa pikas bahin una ng gipasalig ni House Speaker Pantaleon Alvarez, Siargao Gov. Sol Matugas ug Surigao del Norte Rep. Francisco Jose Matugas nga dunay budget nga gigahin ang Kongreso alang sa mga kulang nga imprastuktura sa isla sa Siargao.
Samtang giseguro ni House Speaker Pantaleon Alvarez nga miaksyon na ang lokal nga panggamhanan sa Surigao del Norte human sa aksidente.
Sa gipagawas nga statement ni Alvarez, gibutyag niining nakig-alayon na ang iyang buhatan nila Gov. Sol Matugas ug Rep. Francisco Jose Matugas mahitugod sa isyu sa kakulangan matud pa ug mga first aid ug health facilities alang sa mga turista.
