BUTUAN CITY- Pa-imbestigahan ni Surigao del Norte Congressman. Robert Ace Barbers ang grabe kataas nga presyo sa matag-litro gasolina ug krudo sa Siargao Islands.
Sa eksklusibong pakighinabi sa Bombo Radyo Butuan gipadayag ni Cong. Barbers, nga iyang paimbestigahan sa Department of Energy (DOE) ang taas nga presyo sa gasolina ug krudo sa Siargao nga miabot og hantod sa 70 pesos matag litro resulta sa pagpiyait sa katawhan sa maong isla.
Sumala ni Barbers, naka-abot na kaniya ang impormasyon nga basin adunay dakong politikong nagpaluyo ug nag-control sa mga taas nga presyong gipatuman sa lana sa maong lugar nga kansa gihimo matod pang income generating isip pagpangandam alang sa 2022 elections.
Ning nakalabay nga tuig matod pa nagtunhay ang maong taas nga presyo sa lana sa Siargao.
Niadtong Lunes, Hulyo 5, 2021 gipatawag ang mga gasoline dealers ug mga transport sector tungod sa issue nga grabe kamahal ang kada litro sa gasolina ug krudo.
Nangatarungan usab ang usa sa namaligya sa fuel products nga mahal kaayo ang gasto sa pagtabok niini gikan sa mainland.
Sa Hulyo 8,2021 anaa sa P62.77/liter ang Regular Gasoline sa ubang gasolinaha sa Siargao P63.27/liter sa Premium Gasoline ug P53.80/liter sa Diesel.
Samtang ang ubang gas station walay gibutang nga presyo.
Alang usab kang Cong. Barbers kung tinuod man galing ang nagtumaw nga impormasyon nga politiko ang naghawd sa presyohan sa lana sa Siargao panahona na matod pa aron mamalandong ang katawhan sa lugar sa gusto nilang mahimong sunod lider.
Sumala usab sa kongresista nga gawas sa iyang pag-paimbestiga dapat usab muhimo sa ilang kabahinan ang katawhan pinaagi sa pagpili og saktong politiko sa muabot nga piniliay nga makatabang sa ilang lugar.
