BUTUAN CiTY – Wala nay kredibilidad ang pagdungog sa Senate Blue Ribbon Committee niadtong Lunes, Enero 19.
Sumala ni Jeffrey “Ka Eric” Celiz, Secretary General sa Bangon Sambayanan, daghang panghitabo ang kinahanglan pa nga ipasabut ug tul-iron apan klaro na sa katawhan nga gipugos lang nila Senate President Pro Tempore ug Chairman sa Senate Blue Ribbon Committee Panfilo “Ping” Lacson ug Senate President Vicente “Tito” Sotto III ang pagpadayon sa imbestigasyon bahin sa iskandalo sa korapsyon nga gikalambigit sa administrasyon ni Pangulong Ferdinand Marcos Jr. ug sa iyang ig-agaw nga si kanhi House Speaker Martin Romualdez.
Sigon ni Caliz, wala nay kredibilidad ang komite ingon man ang Independent Commission for Infrastructure kon ICI tungod kay wala nila gipatawag si Romualdez ug si Zaldy Co aron motistigo, samtang pugsanon nga gipa-angkon ang mga kontrobersiya sa mga Discaya bisan pa nga mas bug-at ang testimonya ni Orly Guteza ug Zaldy Co nga nag-ingon nga adunay mga delivery sa bilyones pisos sa Forbes Park ug McKinley Road.
Gimik ra matud pa sa komite ang pagpresentar og mga testigo nga wala’y lig-ong ebidensya ug mas gibalewala ang lig-ong pamahayag ni Zaldy Co nga sila Romualdez ug Marcos Jr. ang naggamit sa Forbes Park isip drop-off point sa kwarta gikan sa mga proyekto sa Bulacan nga nagkantidad og P52 bilyon.
Dugang pa ni Ka Eric, migawas sa hearing nga daw gustong putlon nila Ping Lacson ang pagkalambigit o connection sa Forbes Park kang President Marcos, inay mihimo og mga sitwasyon aron ilikay ang isyu kang Romualdez ug Marcos.
Gipunting usab niini, nga sukad mimani-ubra ang duha ka senador nawala na ang kredibilidad sa komite. Gipadayag usab ni Celiz, nga ang Golden Pheasant Holdings Corporation, nga gi-operate ni Atty. Jose Raulito Paras kinsa fraternity brother ni Romualdez, maoy nag-facilitate sa transaksyon sa Camarines Street, apan wala kini gipublikar sa komite.
