BUTUAN CITY – Gilambigit ni kanhi House Committee on Appropriations chairman Elizalde ‘Zaldy’ Co si House Majority Leader Sandro Marcos – anak ni Pangulong Ferdinand Marcos Jr. sa illegal insertion sa 2025 national budget.
Sa usa ka bag-ong video nga gi-post ni Co sa iyang social media, gibutyag niini, nga gipangunahan ni Marcos ang P9.636 billion nga insertion sa 2023 budget, P20.174 bilyon sa 2024 ug P21.127 bilyon sa 2025.
Nahibaloan niini gikan sa mga kontratista nga suko matud pa si Sandro Marcos niadtong gihisgutan ang 2025 GAA ug gibaharan siya nga tang-tangon sa pwesto ug file-lan og daghang kaso tungod kay kuwang og P8 bilyon ang insertion nga gustong ipasulod niini.
Gibulgar usab ni Co, nga direktang gimando sa Presidente nga ipadayon ang mga insertions. Gani, dihang nagkita sila ni Marcos sa Malacañang niadtong Marso, kauban si kanhi House Speaker Martin Romualdez, klaro nga dili matud pa kini mosupak sa mga insertions.
Matud pa ni Co, giplastar ni Undersecretary Jojo Cadiz ang speech human nasuko ang Presidente, bisan napasa na matud pa niini ang P1 bilyon sa “payouts” niadtong Disyembre 2024 ug misunod ang P100 bilyon nga insertion sa 2025 budget nga gimando usab sa pangulo.
Gibutyag usab ni Co, nga misulat siya sa Presidente niadtong Pebrero ning tuiga ug gipasabot nga mosunod kini sa deriktiba nga ipasa ni kanhi Budget Secretary Amenah Pangandaman.
Sa meeting matud pa niadtong Marso ning tuiga, didto na niya naklaro nga ang P100 bilyones nga insertion, gikan mismo sa presidente.
Gipagawas ni Co ang pamahayag human gitawag nga “hearsay” sa Malacañang ang iyang mi-aging mga video statements.
