BUTUAN CITY – Wala na hatagi og higayon sa nagdepensang San Miguel Beermen ang TNT Tropang 5G nga maka-abot pa sa game seven sa ilang championship series human nila kini giparot sa Season 50 PBA Philippine Cup kagabii sa Mall of Asia kon MOA Arena sa Pasay City.
Nanguna si nine-time PBA MVP June Mar Fajardo nga duna’y 29 puntos ug 23 rebounds, samtang adunay tag-19, 15 ug 13 puntos sila CJ Perez, Rodney Brondial ug Marcio Lassiter, matag-usa.
Gisira sa San Miguel ang serye sa kartadang 4-2 sa ilang best-of-seven nga panagsangka batok sa TNT alang sa ika-12 nga korona sa Philippine Cup ug ika-31 sa kinatibuk-an sukad 1975.
Nalabwan sa Beermen ang pagbangon sa Tropang 5G gikan sa 21 puntos nga kahinay sa first period ug sa nahibilin nga 66-68 sa 1:58 minuto sa third quarter, aron makaposte og 85-73 nga abante sa 4:01 minuto sa final canto.
Ang duha ka sunod nga basket ni Brondial mao ang hingpit nga nagpalayo sa San Miguel sa score nga 89-73 sa nahibiling 3:07 minuto sa duwa.
Gipangunahan ni Calvin Oftana ang TNT uban sa iyang 28 puntos lakip ang unom ka three-point shots. Init kaayo ang pagsugod sa San Miguel sa 12-0 nga run, ug gilapdan kini ngadto sa 20-2, pinaagi duha ka sunod nga tres ni three-point king Marcio Lassiter.
Ang basket ni Fajardo sa 3:34 minuto maoy nagpalubong sa TNT sa 24-5, hinungdan nga gitawag ni coach Chot Reyes ang iyang ikatulong timeout sa first period.
