BUTUAN CITY – Andam na ang Butuan City Police Office pag-deploy sa ilang mga sakop karong Oktubre 31 alang sa kalag-kalag.
Sumala ni PLt. Joy March Estioco, tigpamaba sa maong buhatan, duna’y 32 ka mga sam-ang sa 86 ka mga barangay ning siyudad, kondiin 17 niini, ang pahigayunan lamang nila og mobile patrol tungod na sa kalayo, samtang ang uban, maoy butangan og mga pulis.
Magbutang usab sila og Police Assistance Desk sa gawas nga bahin sa mga sam-ang aron mas mapadali ang pagserbisyo sa katawhan. Aduna kini mga membro sa kasumdaluhan, mga bombero, sakop sa Philippine Coast Guard, mga barangay tanods, medical teams ug mga traffic enforcers aron masiguro ang hapsay ug malinawong pagduaw sa katawhan sa lubong sa ilang mitaliwan na nga mga mahal sa kinabuhi.
Sigon usab niini, sa Nobyembre 1 ug 2, full force na ang tanang uniformed personnel, dili lang kapolisan, aron masiguro ang kalinaw ug kahapsay sa dakbayan.
Nanawagan kini sa tanan nga sundon ug respituhon sa mga mobisita sa sementeryo ang mga patakaran aron makasulod sila sa mga sam-ang.
Sa Nobyembre 3, magpadayon gihapon ang mobile patrolling aron masiguro ang seguridad bisan liwas na sa Kalag-Kalag.
