BUTUAN CITY – Anaa sa kritikal nga kahimtang si Prime Minister Robert Fico sa Slovakia human kini gipusil. Nahitabo ang pagpamusil human ang gihimong tigom niini sa lungsod sa Handlova.
Ang suspek misagol sa mga tawo aron itimbaya ang prime minister sa gawas sa cultural center. Walay lain pang nasamdan sa insidente samtang naaresto sa mga otoridad ang suspek.
Gidala na sa ospital ang nasamdang Prime Minister. Nailhan usab ang namusil nga suspek nga 71-anyos nga Poet ug Miyembro sa Pro-Western Progressive Party nga si Juraj Cintula gikan sa lungsod sa Levice. Si Cintula ang dugay nang kritiko ni Fico diin sa iyang social media post makita ang mga batikos niini sa Prime Minister.
Gikondina usab ni Slovak President Zuzana Čaputová ang panghitabo ug gipaneguro niini ang imbestigasyon sa insidente.
Sa gihimong press conference sa gawas sa ospital sa Banská Bystrica diin gitambalan ang primero ministro, gibutyag ni Interior Minister Matúš Šutaj Eštok nga pulitika ang motibo sa pagpamusil base sa inisyal nga pakighinabi sa suspek.
Gikumpirma usab sa opisyal nga lima ka higayong gipusil si Prime Minister Robert Fico. Subay niini daghang mga nasud na ang mipaabot og pagkondena sa panghitabo.
