BUTUAN CITY – Wala magdahom ang usa ka batan-ong street sweeper sa Bangkok, Thailand nga gikan sa iyang kapobre, mahimo siyang adunahan tungod lang sa Tiktok sa nakakita kaniya nga usa ka Russian photographer ug instant nga nagpasikat kaniya.
Nagsugod ang rags-to-riches nga istorya ni Noppajit “Meen” Somboonsate ning mi-aging buwan, dihang ang 28-anyos nga single mother sa duha ka mga bata, nasigpatan sa kadalanan sa Bangkok ni Russian photographer Semyon Rezchikov.
Nasayrang samtang kamulo og panilhig sa dalan si Meen, wala niya namatikdi nga nadani na sa iyang natural nga ka-anyag si Rezchikov, ug gikuhaan siya og hulagway sa layo. Hangtud nga giduol na siya ug gipakita ang iyang hulagway dayong dayeg sa iyang ka-anyag. Iyang gikuhaan og video ang tanang hitabo ug gi-post sa iyang TikTok nga daling nag-viral tungod kay mibilib sa iyang ka-anyag ug gusto pang masayod og dugang kalabot sa iyang kinabuhi.
Dihang gi-interview sa mga media outlets, gipadayag ni Noppajit Somboonsate nga usa ka tuig na siyang street sweeper ug malipayon siya sa iyang trabaho ug nakurat na lang siya sa kadaghan na sa mga tawong miduol kaniya human sa post ni Rezchikov.
Apan sinugdanan lang kadto tungod kay karon, model na siya sa usa ka brand sa cosmetics ug giduol na sa ubang mga brands ug marketing agencies alang sa mga collaborations.
Opisyal na niyang gi-anunsyo ang pag-undang nasa iyang trabaho isip usa ka street sweeper tungod kay iya nang tutukan ang iyang bag-ong career.
