BUTUAN CITY – Nanawagan ang Simbahang Katoliko og dinaliang ceasefire sa Middle East, uban sa pag-awhag sa publiko nga likayan ang pagkamanhid atubangan sa padayon nga armadong panagbangi.
Sa pakighinabi sa Bombo Radyo Philippines kang Rev. Fr. Adrian Louie Atonducan sa Congregation of the Immaculate Heart of Mary, gitumbok niini ang kamahinungdanon sa malinawon nga dayalogo.
Sumala sa pari, ang tinuod nga kaisog sa mga lider sa nasud makita sa ilang paglingkod aron mag-estorya, dili sa pagpabuto og mga bomba.
Apil usab sa iyang mensahe ang pag-ampo alang sa kaluwasan sa mga Overseas Filipino Workers (OFWs) nga naapektohan sa kagubot sa rehiyon.
Gipananglitan ni Fr. Atonducan ang ilang mga sakripisyo sa pasyon sa Ginoo.
Aron maghatag og paglaum, iyang gipaambit ang iyang kasinatian sa Haiti, diin ang pagtuo maoy nahimong kusog sa mga lumulupyo taliwala sa grabeng krisis ug kakulang sa seguridad.
Gawas sa panawagan alang sa kalinaw, gipaambit usab sa pari ang mensahe ni Santo Papa Francisco alang sa World Communications Day nga adunay tema nga “preserving human voices and faces.”
Gibutyag niini nga ang mga biktima sa giyera dili angay tan-awon isip mga numero lamang, tungod kay ang matag usa adunay dignidad ug kaugalingong istorya.
Gipasidan-an usab ang publiko nga dili mahimong maanad o mawad-an og pagbati sa matag balita bahin sa giyera; hinuon, kinahanglan hatagan og nawong ug tingog ang mga apektadong tawo.
Gipahinumduman usab sa pari ang mga magtutuo nga ang Semana Santa dili lang panahon sa bakasyon, kundili usa ka balaan nga higayon sa pagbalik ug pagduol sa Diyos.
