BUTUAN CITY – Na-aresto sa tropa sa kagamhanan ang ilado nga revolutionary tax collector sa CPP-NPA kagahapon sa alas 4:00 sa buntag sa Barangay Nongnong, Butuan City.
Naila ang nadakpan nga si Emeliano Bustillo Legayna nga naila usab sa alyas Bukas/ alyas Sedoy/ alyas Turko/ ug alyas Abba. Nasikop kini atoll sa implementasyon sa Search Warrant Number 1988-2019 sa paglapas sa R.A. 10591 o Illegal Possession of Firearms and Ammunition pinaagi sa hiniusang element sa 23rd Infantry Battalion, Military Intelligence Battalion nga ilalom sa 402nd Brigade ug sa Butuan City Police Office.
Nakumpiska sa posisyon sa suspek ang kalibre 45 nga pistol og hand grenade. Ang suspetsado naila usab nga Liaison, Intel Officer ug Commanding Officer, sa Militiang Bayan (MB) Butuan West, Guerilla Front (GF) 4A, ug North Central Mindanao Regional Committee (NCMRC).
Sa pakighinabi ning sibyahan kang Lt. Col. Francisco Molina, Commanding Officer sa 23rd Infantry Battalion, Philippine Army, gipasalamatan niini ang katawhan sa Barangay Nongnong, Butuan City nga maoy mihatag ug impormasyon sa presensiya sa suspek nga nagdala-dala ug armas samtang nangayu ug revolutionary tax.
Samtang sa pakighinabi sa opisyal ngadto sa nadakpan, hilabihan matud pa ang pagbasol niini nga wala siya masanong nga biyaan ang grupo.
Mihangyu pa ang nadakpan sa tanang nagpabiling naglihok sa kabukiran nga mobalik na sa sabakan sa gobyerno.
