BUTUAN CITY – Dakong garbo alang sa Bombo Radyo Butuan ang pagbisita dinhi sa sibyahan sa usa ka Butuanon fashion designer kinsa sikat na karon sa Hollywood tungod sa mga celebrities nga iya nang nasininaan.
Sa eksklusibong pakighinabi ning sibyahan, gibutyag ni Resty Lagare nga mipa-uli siya karon sa Pilipinas human mibiya dinhi sa Butuan napulo ka tuig na ang nakalabay aron dalhon sa Pilipinas ang iyang fashion designing talent gikan sa Hollywood sa Los Angeles, California.
Gibutyag ni Lagare nga ang pinaka-una niyang nasininaan sa Hollywood mao ang Mexican star Thalia kinsa misikat sa Pilipinas tungod sa mga klik niining TV series sama sa ‘Marimar’ , Maria Mercedes, Maria del Barrio, Rosalinda og uban pa.
Iya na usab nga nasininaan ang sikat nga hotel heiress nga si Paris Hilton, ang sikat nga si DJ Kasturi, ang miyembro sa girl band nga Spice Girls nga si Mel B, apil na ang Mexican singer/actress Ana Barbara ug American singer, rapper ug producer nga si Ashanti.
Garbo usab niyang gipa-ambit nga nakuha niya ang pinaka-peak sa iyang career gihang siya ang nag-finale sa Germany’s Next Top Model 2017 kondiin gisuot sa mga modelong finalists ang iyang mga fashion designs uban sa sikat nga modelong si Heidi Klum.
Tungod niini, hangtud karon siya ang nagsinina sa mga modelo human gihatag kaniya ang tulo ka tuig nga kontrata.
Ang dako niyang kalampusan gawas sa nasud, ang nag-aghat kaniyang dalhon kini sa Pilipinas nga hatud na usab sa iyang pagka-Filipino. Gani, nagsugod na ang pagsinina niya sa pipila ka mga local celebrities sama kang Anne Curtis.
Karon nakig-alayon na usab siyang daan sa sikat nga mga national ug local fashion designers alang sa dakong kalihukan nga himuon karong Mayo sunod tuig.
