BUTUAN CITY – Nagpadayon karon ang signature campaign sa grupo nila Romeo Ednilan ngadto sa 159 ka mga membro sa Diamond Transport Service Cooperative kon DATSCO aron mutambong sa himuong general assembly ugmang adlawa.
Kini human nakumpirma nga wala magpadala og notisya ang ilang chairman nga si Evans Lawenko ngadto kanila taliwa nga nasabutan na nila niadtong Agusto 12 nga tigom uban sa taga-Cooperative Development Authority kon CDA-Caraga ug Land Transportation, Franchising and Regulatory Board kon LTFRB-Caraga nga ipahigayon kini ugmang adlawa.
Sigon ni Ednilan, as of kaganinang buntag, lapas na sa katunga sa ihap sa mga regular members ang mipirma sa maong signature campaign.
Gani apil sa ilang gikampanyahan ang ilang mga ka-ubanang dili na aktibo aron usab sila mutambong sa ingon sila mismo ang makadungog kung unsa na ang status sa ilang koop.
Nakuha na matud pa nila ang suporta sa uban nilang mga ka-ubanan sa nagkada-iyang lalawigan ning rehiyon ilabina sa Siargao Islands kansa seinto-porsientong mihatag sa ilang suporta alang sa asembliya ugmang adlawa.
