BUTUAN CITY – Gipadayag ni Atty. Hillary Olga Reserva, nga adunay legal ug political nga implikasyon ang gipangbulgar ni Senadora Imee Marcos batuk sa iyang igsoong presidente nga mahimong gamitong basehan sa posibleng pagpasaka og impeachment case.
Dugang sa abogada, tungod kay naggikan mismo sa igsoon sa presidente ang maong exposé, duna kini dakong epekto sa kredibilidad ug pagsalig sa katawhan sa liderato sa nasud. Nakit ausba ni Atty Reserva nga dugay nang vocal batok sa administrasyon ang senadora apan wala kini mitira derikta ngadto sa iyang igsoon kundi pasaring lang ngadto kang kanhi House Speaker Martin Romualdez.
Ang kabug-at sa pamahayag niini batok sa presidente, posibleng aduna’y dakong epekto sa politika ug hustisya sa Pilipinas.
Samtang gipadayag usab Atty. Ferdausi Cerna, nga dako kaayo ug epekto ang mga pamahayag ni Senadora Imee Marcos batuk sa iyang igsoon nga si Pangulong Bongbong Marcos tungod kay gikan mismo kini sa sulod sa pamilya ug makita ang kaseryoso sa iyang gipangbatbat.
Sigon ni Cerna, natural lang nga dili ipagawas sa publiko ang mga problema sa pamilya, apan tungod sa kusog nga panawagan sa katawhan ug sa mga krisis nga gi-atubang sa nasud sama sa baha, linog ug kalisod sa ekonomiya, dinhi na napugos si Imee sa pagbulgar sa kamatu-uran.
Ang maong mga pamahayag makadaot sa kredibilidad ug integridad sa presidente, apan anaa gihapon kaniya kung unsaon niya pag-atubang ug pagdesisyon ang tanan, human sa kontrobersyal nga pagbulgar sa iyang igsoon.
