BUTUAN CITY – Eksklusibong nakuhaan ug pamahayag ning sibyahan ang sibilyan nga samdan human gipusil sa usa ka pulis sa nakalabay nga alas 10:35 sa gabii sa may JC Aquino Avenue ning siyudad sa Butuan.
Naila ang biktima nga si Harvey Joy Berundo, 20-anyos nga lumad nga taga Barangay Uno, Cabadbaran City ug kasamtangang nagrenta ug kapuy-an sa may Zacor, Brgy. Tandang Sora, Butuan City.
Saysay pa ni Berundo, migawas siya niadtong mga orasa aron unta magpa-washing sa iyang motor apan tungod kay sirado na ang hulog-hulog 5 nga pang-washing, wala siya nadayun hinoon nagpalit kini ug ice cream sa usa ka convenience store sa maong dapit.
Human siya nakapalit, mi-angkas na siya sa motor aron unta mopauli tungod kay trabaho pa siya pagkabuntag ngadto sa opisina ni Dr. Hipol.
Dinhe na siya giti-unan sa likod nga bahin sa maong pulis nga nakasibilyan ug gimanduang dili molihok.
Apan tungod sa iyang panglantaw sa pulis, daw isog kaayu ug tinan-awan, hilabihan ang iyang gibati nga kahadlok hinungdang mipadagan siya sa iyang motor.
Dinhe na siya gipusil og naigo ang iyang paa rason sa iyang pagkatumba didto dool sa police box. .
Gisundan usab siya suspek og samtang naghigda na sa dalan, gikuha pa niini ang iyang helmet dayung pangutana sa iyang ngalan.
Human siya mitubag, ang suspetsado pa ang mibutyag sa mga pulis nga anaa sa police box nga nidagan matud pa ang nakapusil.
Wala nalang siya mitingog kay basin ug tiwasan siya, apan sa dihang wala na ang maong suspek, mitug-an siya nga ang nasangpit nga pulis ang mipusil kaniya kansa gisegundahan usab sa mga tindera sa tindahan.
Dinhe na gidis-armahan sa ang suspetsadong pulis sa iyang mga kaubanan samtang siya gidala sa Butuan Medical Center ug karun anaa na sa luwas nga kahimtang.
