BUTUAN CITY – Pakyas pagsulod sa Olympic Qualifying Round nga himuon unta karong Hunyo 27 ang mga surfers nga gikan sa Siargao Islands sa Surigao del Norte human nga kutob lang sila sa top 20 ug top 16 sa gi-apilang world surfing games nga ISA World Surfing Games 2021 nga gipahigayon sa La Bocana ug El Sunzal sugod niadtong Mayo 29 ug matapos karong Dominggo Hunyo 6.
Sa eksklusibong pakighinabi sa Bombo Radyo Butuan, gipadayag ni Bombo Siargao correspondent Roel Catoto nga parehong napildi kaganinang sayo sa buntag ang pambato sa Siargao Islands sa men and women’s division taliwa nga kanunay silang nag-una sa elimination round batuk sa 147 ka mga babaye ug 150 ka mga lalaking surfers nga gikan pa sa 51 ka mga nasud sa tibuok kalibutan.
Una matud pang natangtang sa men’s division si John Mark ‘Marama’ Tokong kinsa igo lang nakatungtong sa Top 20 kondiin upat ka daug na lang matud pa unta ang kinahanglang kuhaon niini apan natagak siya sa surf board sa last diving seconds.
Ingon niini usab ang nadangatan ni Nilbie Blancada kinsa igo lang nakatungtong sa Top 16 ug duha ka daug na lang unta ang iyang kuhaon apan na-apsan siya ug pila lang ka punto sa iyang karibal nga Japanese surfer.
Bisan pa man sa ilang kapildihan, daghan gihapon ang mitimbaya sa mga Siargaonon surfers tungod sa ilang world-class performances kondiin k,anunay silang mag-una og puntos sa mga elimination rounds batuk sa kapin 300 ka mga world surfers.
Daghan matud pa sa mga spectators ang dili makatuo nga duna usa’y mga maayong surfers ang Pilipinas nga sa ilang pagtuo, maayo lamang sa boksing.
