BUTUAN CITY -Pabiling walay linya sa kuryente ang Siargao Island karung adlawa, 0 13 na ka adlaw sukad nga naputol ang linya niadtong Disyembre 1.
Kini ang gikumpirma mismo sa usa sa residente sa maong isla nga si Earl Matthew Fortun-Uy sa eksklusibong pakighinabi ning sibyahan.
Hinoon malaumon kini nga mabalik na sa dili madugay ang sugang dagitabnon sa ilang lugar human nakita na og nahaw-as ang naguba o nadaot nga submarine cable.
Sumala pa ni Fortun-Uy nga alas 5:00 sa hapon sa nakalabay nga adlaw sa dihang na-detect ang nadaot nga linya og kagahapon sa buntag nahaw-as na kini pinaagi sa crane.
Nagtoo usab kini nga tungod sa kadugayon na ang rason nga nadaot ang maong linya. Gipa-ambit usab niini nga inanay nang naka-adaptar sila sa pagkawala sa sugang dagitab.
Kini dayung pagpasalamat sa mga tawong mitabang kanila ilabina kay nakabalik na ang iyang negosyo bisan paman sa panghitabo./
