BUTUAN CITY – Duna na’y person of interest ang Butuan City Police Station 4 sa natigayong pagpamusil kagabii sa Brgy. Ampayon ning siyudad nga miresulta sa pagka-angol sa usa ka dispatcher hinungdan sa pagkalandig niini sa ospital.
Gi-ila lamang ang biktimang si alyas Tuko, minyo, ug residente sa Brgy. Basag ning siyudad. Nasayrang kalit lamang gipusil ang biktima samtang kini anaa kilid sa national highway sa P-4, atbang sa Rotonda sa nahisgutang Barangay.
Na-igo kini sa iyang wala nga abaga kondiin narekober sa kapulisan ang tulo ka mga basiyo sa gitu-uhang kalibre punto-45 nga pistola.
Sa eksklusibong pakighinabi sa Bombo Radyo Butuan, gibutyag ni station commander PCaptain Dennis Bon nga padayon pa ang ilang imbestigasyon sa maong hitabo ilabina nga sukad pa ning mi-aging mga buwan, nakadawat na matud pa og hulga sa iyang kinabuhi ang biktika.
Apil sa anggulong ilang gitutukan ang personal nga away ingon man posibleng bangi nila sa ilang personal nga transaksyon.
Apil sa ilang arekober sa crime scene ang cellphone sa biktima ug dihang ila kining gisusi, wala matud pa sila’y nakitang convo nga posibleng maghatag kanila og lead aron matumbok gayod ang motibo sa kremin. Hinuon, usa sa ilang gitutukan ang posibleng nakatransaksyon sa biktima ning mi-aging mga buwan human kini nagpa-blotter sa ilang buhatan, niadtong nalambigit matud pa kini sa kalihukan sa ginadiling druga.
