BUTUAN CITY – Narekober na sa search and rescue team ang patay’ng lawas sa unom ka tawo nga sakay sa nahagsa nga super huey helicopter sa Philippine Air Force kon PAF sa lungsod sa Loreto, Agusan del Sur kagahapon.
Sigon ni Col Ma Christina Basco, tigpamaba sa Philippine Air Force, ang mga biktima nga gilangkuban sa duha ka piloto ug upat ka crews, mga membro sa ilang search and rescue group ka-uban ang lain pang tulo ka mga helicopters.
Gikan sa Davao City ang maong chopper ug padulong unta dinhi sa dakbayan sa Butuan aron unta mag-preposition ingon man maghatud unta og mga hinabang ngadto sa mga biktima sa bagyong Tino dihang wala na sila ma-contact sa ilang mga ka-ubanang sakay sa laing tulo ka mga helicopters.
Padayon pa ang gihimong imbestigasyon aron masuta ang hinungdan sa pagkahagsa sa nasangpit nga helicopter.
