BUTUAN CITY – Malampusong nasunog kaganinang buntag sa ginsakpan sa Philippine Drug Enforcement Agency kon PDEA-Caraga ang kapin sa ₱15.3-milyunes pisos nga ginadiling druga sa may Orgon Wood Industries, Incorporated nga nakabase sa Sitio Bingkilan, Brgy. San Vicente ning siyudad sa Butuan.
Sigon ni regional director Levi Ortiz sa eksklusibong pakighinabi sa Bombo Radyo Butuan, kadaghanan sa mga gisunog mao ang shabu nga mi-abot sa 2,238-gramos nga mikantidad og ₱15,220,148.88 dayon ang marijuana nga mitimbang og 1,369-gramos kansa bugti sa ₱164,382.47.
Mao matud pa kini ang na-aprubahan na sa nagkada-iyang korte sa Caraga Region nga subject for destruction human nga napresenta na isip mga ebidensya. Giklaro sa opisyal nga sa maong gidaghanon, wala pa’y labot niini ang 15-kilos sa shabu nga ilang nakumpiska sa Bayugan City, Agusan del Sur tungod kay gipa-reschedule kini sa huwis sunod buwan.
Giklaro usab sa opisyal nga ubos sa balaud, ang pagsunog sa nakumpiska nga mga ilegal nga druga ang bugtong paagi nga himuon.
Tungod kay wala’y thermal facility ang Caraga Region sukwahi sa ubang rehiyon, rason nga gihimo kini sa planta kansa mao ang pinakaha-um nga venue niini.
