BUTUAN CITY – Orchestrated ni Presidente Ferdinand Bongbong Marcos Jr. ug sa mga ka-ubanan niini ang paglahugay sa liderato sa Senado. Gituohan ni Jeffrey Celiz, Secretary General sa Sambayanan nga gusto matud pang makuha ni Marcos ang liderato sa Senado sa ingon, mapalagpit niini ang mga ka-alyado ni Vice President Sara Duterte gikan sa mga gamhanang komitiba sama sa Senate Blue Ribbon Committee.
Nasayrang dili lang si Chiz Escudero ang gihulipan ni Tito Sotto isip Senate President kondili lakip na usab si Senador Rodante Marcoleta ang gihulipan ni Ping Lacson isip chairman sa Senate Blue Ribbon Committee apil na ang mga Senador nga gikan sa kanhi minority, ug karon mao nay naghawid sa majority.
Dugang pa ni Celiz, wala matud pay laing nakita si Marcos aron tabunan ang kadako sa nahimo niining kurapsyon kauban sa House Speaker nga si Martin Romualdez, kansa ig-agaw usab niini, kundili ang paamuhon og balik ang Senado.
Gusto usab matud pa ni Marcos ang co-opted nga liderato sa Senado ingon man sa House of Representatives. Subay pa ni Celiz, sa iyang nakita, daw pagpangandam na usab ang nasangpit nga lakang karung umalabot nga Pebrero 2026, ang gikatakdang bulan sa korte Suprema aron subli na usab nga makasang-at og impeachment complaint ang House of Representatives batuk kang VP Sara.
Ugaling mahitabo na kini, dili na maglisod ang Senado sanglit kulang na lang man og usa ang kasamtangan nga majority para mahimong 16, ang kinahanglang numero nga mopabor arun ma-convict si Vice President Sara Duterte.
