BUTUAN CITY – Walay foul play nga nakita ang Scene of the Crime Operation kon SOCO sa pagkamatay sa usa ka senior citizen sa Barangay Mahogany ning dakbayan sa Butuan ning nakalabay nga adlaw.
Kahinumduman nga patay nang napalgan sa Agusan River sa P-4 Brgy. Mahogany ning syudad sa Butuan si Saturnina Mapalo alyas Turning, kinsa nakita matud pa kini sa mga batan-on sa ilang lugar nga naglutaw sa suba dihang ta-ub pa, apan wala nila kini bali-baliha sa pagtuong dulaan lang kini nga naanod.
Nakumpirma na lang nila nga tawo kini paghunas na sa tubig. Sumala ni PLT Crispulo Alburo, ang tigpamaba sa Butuan City Police Office, nasuta nga nagkabo pa og tubig ang biktima adiser kini nakita nga nagbuy-od nalang og wala nay kinabuhi. Nasuta pa nga siya lamang usa ang anaa sa ilahang balay niadtung tungora.
