BUTUAN CITY – Nagtingkagol na sa karsel sa Libertad Municipal Police Station, ang 53-anyos nga si Agapito Pacquiao human niini gibunal-bunalan og tubo kagahapon sa buntag, ang 72-anyos nga silingang si Alfonso Ragmac, parehong residente sa Purok 5, Brgy. Poblacion, sa lungsod sa Libertad, Misamis Oriental, hinungdan sa kamatayon niini.
Sigon ni Libertad Municipal Police Station Deputy Chief of Police PCaptain Jenny Relevo, boluntaryong mitahan ang suspetsado human sa ngilngig niining pagbunal-bunal sa ulo sa biktima gawas sa usa ka tindahan.
Migawas sa ilang inisyal nga imbestigasyon nga personal grudge ang motibo sa kremin tungod kay dugay nang adunay bikil ang duruha human matud pa, gisinggit-singgitan sa biktima ang suspetsado nga mopahawa sa gipuy-an niini tungod kay anaa kini sa iyang luna nga tapad ra sa panimalay sa biktima.
Migrabe ang away sa duruha human matud pa, na-apil og lampas sa suspek ang tanom sa biktima kondiin nangayo na og pasaylo ang suspetsado, apan balik-balikan gihapon matud pa kini og singgit sa biktima.
Nagpalit matud pa og sigarilyo ang suspek kagahapon sa buntag ug nakita ang biktima nga nagbitbit na og tubo rason nga mipunit usab siya og bato apan napuspusan gihapon matud pa ang suspek hangtod nailog niini ang tubo gikan sa biktima ug maoy gibalik-balik og bunal sa ulo niini kinsa duna pa’y kinabuhi dihang gibiyaan sa suspetsado.
