BUTUAN CITY – Nanawagan si Senator Francis “Kiko” Pangilinan og mas dakong subsidiya para sa mga mag-uuma ug mangingisda dungan sa padayon nga pagtaas sa presyo sa petrolyo sa pangkalibutanong merkado hatud sa migrabeng tensyon sa Middle East.
Sigon ni Pangilinan, kinahanglang dugangan ang tabang sa gobyerno sa sektor sa agrikultura ug pangisda, dungan sa sayung pagsuspinde sa excise tax sa mga produktong pretrolyo aron maminusan ang kabug-at para sa konsyumer dala sa pagtaas sa presyo sa krudo.
Gipasabot sa senador nga kung masuspinde ang excise tax sa petrolyo, posible nga moubos og mga P6 matag litro ang presyo sa diesel, samtang P10 matag litro ang mahimong ibawas sa unleaded gasoline ug liquefied petroleum gas (LPG), ug P5 matag litro sa kerosene.
Samtang, nagpahayag usab siya og pagkabalaka ug pagkadismaya sa P3,000 nga cash assistance para sa mga mangingisda nga gikan sa P75 milyon nga kasamtangang pondo sa Bureau of Fisheries and Aquatic Resources (BFAR) ubos sa Department of Agriculture (DA).
Matod niya, gamay ra kaayo ang kantidad ug dili angay sa kasamtangang sitwasyon, mao nga kinahanglan pa kini dugangan.
Gipasiugda usab sa senador nga bisan pa og doblehon kini ngadto sa mga P6,000 hangtod P7,000, dili gihapon kini igo kung dili moubos ang presyo sa lana.
Matod pa niya, ang dugang nga subsidiya mahimong kuhaon gikan sa P10 bilyon nga Presidential Assistance to Farmers and Fisherfolks nga gilakip sa General Appropriations Act of 2026.
Tungod niini, nanawagan si Francis Pangilinan sa BFAR nga daliang ipagawas ang guidelines aron maipanghatag dayon ang pondo sa mga benepisyaryo, human sa mga taho nga pipila ka mangingisda ang nagbawas sa ilang mga adlaw sa pagpangisda tungod sa mahal nga gasto sa krudo.
