BUTUAN CITY- Gi-apruba na sa Senado ang Senate Resolution 256 kansa nagakondena sa mga pamahayag sa Chinese Embassy batok sa mga opisyal ug magbabalaod sa Pilipinas human sa mainiton ug taas nga debate sa plenaryo.
Sa diskusyon, nahimong ma-initon ang pagbinatohay og tubag nila Sen. Kiko Pangilinan ug Minority Leader Alan Peter Cayetano kalabot sa paggamit ni Philippine Coast Guard kon PCG spokesperson for West Philippine Sea (WPS) Commodore Jay Tarriela.
Diin gitawag kini ni Cayetano nga bastos, samtang gi-insistar usab ni Pangilinan na ang mga pamahayag sa Chinese embassy ang dili husto. Mingsangpot sa kagubot ang diskusyon human nagjoke si Cayetano kalabot sa pag-post og susamang meme kang Pangilinan, nga mingsangpot sa temporaryong suspensyon sa sesyon sa Senado.
Gani gi-insistar usab ni Cayetano nga kinahanglang tukion sa resolusyon ang mga dili maayong pamahayag sa embahada sa China, aron klaro nga mapakita sa publiko ug sa internasyonal nga komunidad ang posisyon sa Senado.
Ang maong suhestiyon gisang-at ug gi-duso ni Senator Kiko Pangilinan, nga mao ang sponsor sa resolusyon, kansa naglatid sa kahimtang sa relasyon sa Pilipinas ug China ug sa panginahanglan nga ipakita ang united stand sa mga senador. Human sa interpellation ug mga deliberasyon, gi-apruba ang resolusyon subject to style ug walay objection, diin nagpasabot nga walay senador nga misupak sa mosangpot nga desisyon.
Ang maong resolusyon naghatag og mensahe nga ang Senado dili mopasagad sa mga pamahayag nga makadaot sa dignidad ug soberanya sa nasud, ug nagpakita sa determinasyon nga ipaglaban ang interes sa Pilipinas sa taliwala sa nagpadayon nga tensyon sa West Philippine Sea ug sa diplomatikong relasyon sa China.
