BUTUAN CITY – Gisugdan na sa Senate Foreign Relations Committee pagpanguna ni presidential sister Imee Marcos, ang imbestigasyon kalabot sa pag-aresto sa International Criminal Court kon ICC kang kanhi Pangulong Rodrigo Duterte.
Gitambungan kini nila Justice Secretary Jesus Crispin Remulla, National Security Adviser Eduardo Año, Defense Secretary Gilberto Teodoro Jr., Interior Secretary Jonvic Remulla, Solicitor General Menardo Guevarra, Philippine Air Force Commanding General Lt. Gen. Arthur Cordura, ug Philippine National Police Chief Rommel Marbil.
Tumong sa pagdungog nga maklaruhan ang kalambigitan ingon man ang papel sa ICC, sa International Criminal Police Organization kon INTERPOL ug sa nagkada-iyang ahensya sa gobyerno sa pag-aresto kang Duterte.
Tumong usab niini nga makumpirma kung duna’y gihimong mga lakang sa ingon masiguro nga protektado sa kinatibuk-ang proseso ang katungod sa kanhi pangulo ilawom sa domestic laws ug mga tratado. Gipadayag ni Senador Marcos, atol sa hearing, nga gisurender sa gobyerno sa Pilipinas si kanhi Pangulong Rodrigo Duterte ngadto sa ICC aron atubangon ang kasong crimes against humanity. Ang tinuod matud pa nga Filipino, dili itugyan ngadto sa mga langyaw ang kababayang Filipino.
Ubay-ubay nga mga video clips ang gipakita ni Senador Marcos nga nagdokumento sa mga panghitabo gikan sa pag-serve sa electronic arrest warrant dihang mipa-uli ang kanhi pangulo gikan sa Hong Kong hangtud sa paghatud niini ngadto sa Netherlands.
