BUTUAN CITY – Gi-andam na ni Senator Risa Hontiveros ang iyang tubag batuk sa kasong harassment ug pagpamakak mugna sa gipakaylap sa kanhi niya witness sa Senate hearing.
Kini human mitumaw si Michael Maurillo kinsa naila nga si alyas “Rene” ug nagbutyag nga gipugos matud pa siya sa senador nga mutestigo batuk nila kanhi Pangulong Rodrigo Duterte, Vice President Sara Duterte ug Kingdom of Jesus Christ kon KOJC founder Pastor Apollo Quiboloy.
Siya matud pa uban ang lain pang mga testigo, gibayaran sa senadora aron lang da-uton ang maong mga indibidwal samtang ang iyang sinulat nga pamahayag, gidugangan pa sa mga pulong nga gipasakitan matud pa siya sa pastor, taliwa nga wala niya kini gi-apil sa iyang affidavit.
Una nang gibutyag sa senador nga duna sila’y ebidensya nga magpamatuod nga ang gipangyawyaw ni alyas “Rene,” pulos bakak. Ang tanan matud pa nga mga testigo nga gipresenta sa Senado, boluntaryo ug gawasnong nagpadayag sa ilang testimonya.
Duna matud pa siya’y mga papeles gikan sa nagkada-iyang ahensya nga nga maoy magpamatuod sa pasangil niya batuk sa maong mga opisyal ug dako ang pagtuo sa senador nga gibuhian ug gibayaran kini ni Quiboloy aron gub-on ang reputasyon sa Senado.
