BUTUAN CITY – Gipahimangnuan ni Senate President Francis “Chiz” Escudero si Senadora Imee Marcos nga dili gamiton ang Senado isip plataporma alang sa iyang political agenda, subay sa imbestigasyon nga gihimo sa Senate Committee on Foreign Relations kalabot sa pagka-aresto kang kanhi Pangulong Rodrigo Duterte.
Sigon ni Escudero, dili niya pasagdang magamit ang Senado apil ang iyang buhatan sa petty partisan interest, sa propaganda o self-promotion ilabina sa mga mikandidato karong eleksyon.
Gipanghimakak niini nga nagdumili siya pagpirma sa contempt order batuk kang Special Envoy on Transnational Crime Amb. Markus Lacanilao tungod sa padayon matud pa niining paglimod.
Sigon ni Escudero, ang tanang miyembro sa Senado nasayod nga ilalom sa rules sa Senado, ang kagahom sa committee chairman nga magmando og pag-aresto ni bisan kinsa mang resource person, kinahanglan og pirma sa Senate President. Daw gibalewala matud pa ni Marcos ang dugay nang rules ilabina nga dili otomatiko o ministerial lang ang pirma tungod lang sa iyang kagustuhan.
Kini ang rason nga human ang pipila ka oras nga dili otorisadong pagbilanggo kang ambassador Lacanilao sa Senate detention facility, gimando gilayon ni Escudero nga buhian kini tungod kay mao kini ang insakto ug konsiderasyon na usab kini alang sa iyang lolo nga ilubong ning adlawa.
Magpagawas si Escudero og lima ka adlaw nga show cause order aron ipasabot ni Ambassador Lacanilao kung nganong dili siya angayang i-contempt.
