BUTUAN CITY – Nanghinaut si Senador Robinhood Padilla nga mahimong realistic silang tanan nga sakop sa Senate Blue Ribbon Sub-Committee sa ilang gihimong pagdungog kalabot sa angayang padulngan niini ug siguraduhong wala’y bahid sa pulitika.
Sa iyang opening statement kagahapon, gipadayag sa senador nga iyang girespeto ang mga pasi-unang pamahayag sa iyang mga ka-ubanan ilabina sa gisundan niyang pamahayag ni Senadora Risa Hontiveros. Dinhi giyagyag ni Padilla kung unsa ka kampante ang mga yanong tawo panahon sa drug war sa administrasyong Duterte tungod kay makalakaw-lakaw na sa kalsada ang mga tawo ilabina ang mga babaye nga dili mabalaka nga duna’y dautang mahitabo kanila.
Apan kini wala makita sa mga tawong gusto gayong iduot si Duterte tungod sa alegasyong extra judicial killings matud pa ug wala gilantaw ang kaayuhang nahatud niini ngadto sa kinabag-ang katawhan apil na ang datus nga mismong ang mga tawo ang makasulti.
Gipanawong pa ni Padilla ngadto sa tanang mikwestyon sa war on drugs nga kung wala ang kasibot ni kanhi Pangulong Rodrigo Duterte nga puhagon ang mga nalambigit sa pagpayuhot ug paghimo og ilegal nga druga, posibleng grabe na kadaut sa hitsura karon sa Pilipinas.
Dugang sa senador, ang datus matud pa ang makasulti kung unsa ang kahadlok sa mga kriminal og mga drug lords ngadto sa kanhi pangulo nga gitawag pa niyang iron man ug pinaka-maayong presidente sa Pilipinas.
