BUTUAN CITY – Gipanganlan sa International Criminal Court (ICC) sila Senador Ronald “Bato” dela Rosa ug Senador Christopher Lawrence “Bong” Go isip mga co-perpetrators sa kaso may kalabutan sa kampanya kontra droga ni kanhi Pangulong Rodrigo Duterte.
Base sa Document Containing the Charges (DCC) nga pinetsahan og Pebrero 13, 2026, gi-ila si Duterte isip indirect co-perpetrator ubos sa Article 25 (3)(a) sa Rome Statute alang sa mga krimen batok sa katawhan, partikular na murder ug attempted murder.
Nakalatid sa dokumento nga ang mga pagpatay nahitabo gikan sa tuig 2011 hangtod 2019, lakip na ang mga insidente sa Davao City nga binuhatan matud pa sa Davao Death Squad, ug ang mga operasyon sa ilawom sa “war on drugs” sa panahon sa iyang administrasyon.
Sumala sa ICC, ang pag-apil nila dela Rosa ug Go sa listahan tungod sa ilang papel sa pagpatuman ug pagsuporta sa mga polisiya sa drug war.
Apil usab niini ang mga tinudlong opisyal nga kanhi miyembro sa gabinete ug law enforcement agencies nga adunay direktang kalabutan sa operasyon sama nila Vicente Danao, Camilo Cascolan, Oscar Albayalde, Dante Gierran, Isidto Lapeña, Vitaliano Aguirre II ug uban pang opisyal sa Philippine National Police ug high-ranking government officials.
Sa pagkakaron, ang Pre-Trial Chamber nagtuon sa mga ebidensya aron matino kung himuon ba ang pagtaral. Giklaro sa ICC nga ang pagpagawas sa dokumento kabahin sa transparency ug aron ipakita ang cover sa tulubagon sa tinawag nga “war on drugs” sa Pilipinas.
