BUTUAN CITY – Mi-apela na si Senador Ronald ‘Bato’ de la Rosa ngadto kang Pangulong Ferdinand ‘Bongbong’ Marcos Jr. nga ibalik na sa normal ang kinabuhi sa tanan human gi-take over sa kapulisan ang Kingdom of Jesus Christ kon KOJC compound sukad pa niadtong Agusto 24.
Atol sa pagdungog sa Senate Committee on Justice and Human Rights kagahapon nga gihimo sa Davao City, nabati sa committee chairman ang panig sa kapulisan ug sa KOJC pagpanguna sa ilang abogado nga si Atty Israelito Torreon.
Gibarugan ni Police Regional Office-12 director PBGen Nicolas Torre III nga wala siya nalipay sa nahitabo karon sulod sa KOJC compound apan wala matud pa siya’y mahimo kondili ang pagsunod sa iyang gipanumpaang katungdanan rason nga dili sila muhawa hangtud nga dili makuha si KOJC founder Pastor Apollo Quiboloy.
Hapsay unta matud pa ang ilang operasyon kung mu-abag kanila ang mga membro sa nasangpit nga sekta ug dili kay babagan ang ilang gihimo. Gani, nahimo pa kining emosyunal dihang iyang gisaysay nga labaw nga wala siya malpay tungod kay apektado na niini ang iyang pamilya ilabina ang iyang mga anak nga gi-harass na human natud-an ang ilang panimalay.
Dinhi na mi-apela si Senador Bato kang Pangulong Bongbong Marcos nga unta makita niini ang makadismayang sitwasyon, dili lang sa mga KOJC members kondili apil na sa mga pulis gikan pa sa mga lagyong rehiyon nga wala’y tarong katulog, kaliog ug kaon.
