BUTUAN CITY – Duda si Senador Ronald “Bato” Dela Rosa kung tinuoray ba ang pamahayag ni Pangulong Ferdinand Marcos Jr. sa pagpangayo og kalinaw ug pakig-uli sa pamilya Duterte.
Sigon ni Dela Rosa, adunay na siya’y dautang kasinatian kang Marcos diin lahi matud pa ang himuon niini sa iyang mga gipanulti sama sa saad kaniadto ni Marcos nga dili niya tugotan ang International Criminal Court kon ICC nga mosulod sa nasud, apan sa kaulahi-an, gitugotan gihapon resulta sa pagkasikop kang kanhi Pangulong Rodrigo Duterte.
Subay sa pamahayag sa pangulo, gipadayag sa senador nga wala’y gusto og gubot, apan kinahanglan nga tinud-anay ang ipagawas nga mga pamahayag tungod sa kalawom na sa samad nga mugna sa paningkamot sa administrasyon nga madaut ang ilang mga ka-atbang.
Kalabot usab sa naka-atang nga impeachment trial batok kang Vice President Sara Duterte, gibutyag ni Dela Rosa nga mas maayo kung dili na kini ipadayon.
