BUTUAN CITY – Siento-porsientong suportado ni Senador Ronald ‘Bato’ de la Rosa, kung unsa man ang baruganan ni Senate President Chiz Escudero kalabot sa impeachment case ni Vice President Sara Duterte.
Kini ang gipagawas nga manifestation sa senador tungod sa wala’g tuo nga mga batikos nga nadawat sa senate president sa isyung gilangay-langay matud pa niini ang impeachment trial.
Giklaro ni Senador Bato nga wala’y kamatu-uran ang maong mga akusasyon tungod kay pila ka adlaw lang human nadawat na sa institusyon ang Articles of Impeachment, nagpatahi na sila sa ilang impeachment robe kansa timaan sa ilang excitement sa mahimo nilang papel isip impeachment prosecutors.
Hangyo usab sa Senador sa mga migamit sa pulong nga taongbayan nga dili na kini gamiton tungod kay makita sa resulta sa eleksyon nga mayoriya sa katawhan sa Visayas ug Mindanao, dili pabor sa impeachment.
Klaro matud pa nga ang mga tawo lang nga nangusog nga ma-impeach si VP Sara ang migamit sa pulong nga taongbayan kansa dakong insult sa dakong ihap mga tawo sa tibuok Pilipinas nga dili pabor sa impeachment.
