BUTUAN CITY – Gibarugan ni Sen. Risa Hontiveros nga sa tradisyon sa Senado dili dapat maaresto ang bisan kinsang senador samtang anaa sa sesyon ang taas nga balay-balauranan.
Napangutana ang magbabalaod mahitungod sa pagkatumbok nila Sen. Christopher Go ug Sen. Ronald Dela Rosa isip co-perpetrators ni kanhe Pang. Rodrigo Duterte sa iyang giatubang nga kasong crimes against humanity sa International Criminal Court (ICC).
Sigon ni Hontiveros, gisuportahan niya ang nahiunang pamahayag ni Senate President Vicente Sotto III nga walay senador sa Pilipinas ang mamahimong maaresto samtang anaa sa sesyon ang Senado.
Bisan paman niini, aminado usab ang magbabalaod nga mahinungdanong mahisgutan kini sa caucus nga laumang mahitabo ugma Feb. 18.
Sa karun, nagpabilin ang garantiya ug saad ni Senate President Sotto nga dili dapat arestuhon ang mga senador samtang anaa sa sesyon, base na usab sa gitakda sa Philippine Constitution./
