BUTUAN CITY – Nagpadayon karon ang deliberasyon sa Senado sa posibilidad nga ipadayon o isalikway ang impeachment complaint batok kang Bise Presidente Sara Duterte human sa desisyon sa Korte Suprema nga nagdeklara nga unconstitutional ang gi-aprobahang Articles of Impeachment sa House of Representatives — tungod kay nakalapas kini sa balaod nga usa ra ka impeachment complaint matag tuig.
Gitun-an sa mga senador ang 97-ka palid nga desisyon sa Korte Suprema sa dili pa sila mobotar kung ipadayon ba ang pormal nga impeachment trial.
Madumdumang nagpasaka og motion for reconsideration ang House of Representatives sa Korte Suprema, nga nangayo nga rebisahon ang maong desisyon samtang, gihatagan usab og 10 ka adlaw si VP Duterte aron motubag sa maong mosyon.
Ang civil society group nga 1Sambayan, nga gipangulohan sa mga retired justices sa Korte Suprema, mipasaka usab og mosyon nga nag-awhag sa Korte nga magpagawas og status quo ante order — aron mapugngan una ang Senado sa posibleng pagsalikway sa reklamo.
Sa maong deliberasyon, nagmosyon si Senador Rodante Marcoleta sa plenaryo sa Senado nga i-dismiss ang impeachment case batuk kang Vice President Sara Duterte human namahayag na ang Korte Suprema nga unconstitutional ang articles of impeachment batuk sa bise presidente.
