BUTUAN CITY – Hugot nga seguridad ang gipatuman karon sa usa ka pribadong ospital ning siyudad sa Butuan nga gidad-an sa asawa ni Judge Godofredo Abul Jr., kinsa na-angol human ang pagpamusil kaganinang buntag.
Ang maong hitabo, mikalas sa 65-anyos nga huwis sa Regional Trial Court, Branch 4, Hall of Justice nga nakabase sa Brgy. Libertad ning siyudad.
Sa pinaka-ulahing medical bulletin nga nakuha sa Bombo Radyo Butuan, nasayrang anaa sa intensive care unit kon ICU ang byudang si Bernaditha Abul, residente sa Pueok 16, Alviola Village, sakop sa Brgy. Baan Km. 3 ning siyudad sa Butuan.
Sigon ni P/Insp. Ronilo Dormetorio sa Butuan City Police Station 4, natigayon ang maong insidente kaganinang alas-10:05 sa buntag kondiin ang mga suspek, sakay matud pa sa duha ka motorsiklo apan usa lang ka gunman ang mitira sa mga biktima.
Naka-angkon og mga samad-pinusilan sa nagkada-iyang bahin sa lawas apil na sa ilok si Judge Abul hinungdan sa hinanali niining kamatayon. (Beth Ruiz)
