BUTUAN CITY – Nagpahigayon og usa ka Special Meeting pinaagi sa videoconference ang mga ASEAN Foreign Ministers niadtong Marso 13 aron sutaon ang tubag sa rehiyon sa misamot nga kagubot sa Middle East, partikular ang hulga niini sa seguridad sa katawhan ug sa pangkalibutanong ekonomiya.
Sa gipagawas nga pormal nga Chair’s Statement, nagpahayag og dakong kabalaka ang grupo sa managsunod nga pag-atake nga nagsugod niadtong Pebrero 28 diin nalambigit ang Israel ug United States batuk sa Iran.
Gitumbok usab ang nahimong pag-atake sa Israel sa Lebanon ug ang pagbalos sa Iran nga nakaapekto sa nagkadaiyang nasud sa Gulf region.
Isip nag-unang lakang, gipalig-on sa mga ministro ang ilang shared commitment nga protektahan ang kaluwasan sa mga ASEAN nationals nga naipit sa conflict areas.
Gipaneguro sa mga miyembrong nasud ang ilang koordinasyon aron mapadali ang paghatag og emergency assistance ug tabang sa ilang mga kababayan.
Miapela ang ASEAN sa tanang nasud nga nalambigit nga erespeto ang international law ug molikay sa mga lakang nga mas magpasamot sa sitwasyon.
Nanawagan ang grupo para sa immediate cessation of hostilities ug gihagit ang tanang panig nga magpakita og utmost self-restraint.
Gawas sa kaluwasan sa mga sibilyan, makuting gihisgutan sa pulong ang direktang epekto sa giyera sa global economic activity, ilabina sa nag-usab-usab nga energy markets ug pagkalangay sa maritime og air transport routes.
Nabalaka ang grupo sa posibleng pagtaas sa cost of living ug pagkalangay sa supply chains sa pagkain ug lana sa Southeast Asia.
Aron saloon ang mga external economic shocks, gamiton sa ASEAN ang mga nakalatag niining mekanismo sama sa ASEAN Framework Agreement on Petroleum Security (APSA) ug Trans-ASEAN Gas Pipeline (TAGP).
Tumong niini nga pakusgon ang regional energy security ug economic resilience samtang padayon nga giobserbahan sa mga Foreign Ministers ang sitwasyon sa Middle East.
