BUTUAN CITY- Sugdan na karong adlawa Lunes, Mayo 17 hangtud 21 ang second round sa pagpamakuna batok COVID-19 sa mga senior citizens ug mga tao nga adunay comorbidities dinhi sa dakbayan sa Butuan.
Ang ikaduhang round sa pagpamkuna kontra COVID-19 sa A2 priority groups himuon sa upat ka vaccination site nga mao ang SM City Butuan, FSUU Morelos, Robinsons Place Butuan, ug sa dugang nga vaccination post nga Bilay Polyclinic.
Limitado lamang ang bakuna gikan sa Department of Health (DOH) Caraga rasong giapod-apod ug gi-iskedyul ang senior citizens sa lain-laing barangay.
Giklaro sa kadumalahan nga ang barangay ang naghatag og barangay passes sa senior citizens nga naka-iskedyul sa upat ka adlaw.
Rasong kadto lamang adunay barangay pass ang mabakunahan ug ang wala pa, pahibal-on lamang sa sunod nga iskedyul pag abot sa dugang nga bakuna.
Una nang gipadayag ni Michiko De Jesus ang tigpamaba sa LGU-Butuan nga target sa kadumalahan ang 70% sa pupolasyon sa syudad aron maabot ang gitawag nga herd immunity ug lauman nga maabot kini higayon muabot na ang gipalit nga bakuna sa City hall.
