BUTUAN CITY – Gikumpirma ni Presidential Communications Secretary Martin Andanar nga ang mga kontra sa pulitika ang nagpasabwag og mga pekeng balita nga nagdaut kang Pangulong Rodrigo Duterte og sa iyang administrasyon.
Sa eksklusibong pakighinabi sa Bombo Radyo, gibutyag niini nga kung tan-awon ang record sa pagserbisyo sa pangulo, dinhi makita ang maayong record sa ekonomiya pinaagi sa paspas nga pagtubo niini apil na ang taas gihapon nga pagsalig sa mga investors sa pagbubo sa ilang puhunan dinhi sa nasud, wala pa’y labot sa lain pang mga serbisyo.
Hinuon, mihangyo siya sa tanang mga Filipino nga mutabang sa atong nasud og sa ekonomiya pinaagi sa pagsabwag sa maayong balita apil na sa pag-post diha sa social media sa tinuod nga hulagway, mga maayo og nindot nga talan-awon sa atong palibot aron mapasabot ang tibuok kalilbutan nga ang kagubot sa Marawi City, wala naka-apekto sa tibuok Mindanao.
Nanawagan usab siya sa tanan nga dili mutuo sa mga fake news og aron dili mabiktima niini, kinahanglang sa Bombo Radyo lang maminaw sa mga balita tungod kay tinuod nga mga balita ang ipagawas niini nga mapa-ambit pa sa mga silingan. (Beth Ruiz)
