BUTUAN CITY – Gitapos na ang search and retrieval operations nga gipahigayon sa nagkada-iyang ahensya sa gobyerno alang sa mga sakay sa nahagsang Cessna plane kagahapong adlawa didto sa bukirang bahin sa Brgy Navarro, lungsod sa Tubajon, Dinagat Islands province.
Kini human narekober sa mga responders ang gitu-uhang human remains apil na niini ang mga unod ug bone fragments, ingon man buhok nga duna’y managlahng gitas-on nga gitu-uhang iya sa usa ka babaye ug usa ka lalaki kansa gipa-ilalom pa sa saktong beripikasyon.
Narekober usab sa crash site ang mga butang ug ubang mga tipaka nga makutay ngadto sa nagsakay sa abyon.
Gitapos ang operasyon human ang gihimong mga necessary procedures and assessment, uban usab sa pagtugot sa immediate family ug sa Local Government Unit of Tubajon pinaagi ni Tubajon Mayor Fely Pedrablanca, nga mao na’y nag-demobilize sa Incident Management Team pasado alas-4:30 kaganinang hapon.
Nagpasalamat usab ang mga representante sa mga pamilya ngadto sa mga Barangay, Municipal ug Provincial Government Units ug sa tanang activated nga national line response agencies ka-uban ang mga community volunteers tungod sa malampusong misyon ilalom sa usa ka unified command system pinaagi sa Incident Management Team (IMT), kansa maoy nagsiguro sa coordinated, systematic, ug luwas nga operasyon sa lugar nga nahitabuan.
