BUTUAN CITY – Gikumpirma ni Senate President Pro-Tempore Panfilo ‘Ping’ Lacson ang P355 milyon nga budget insertion alang ning tuiga nga gitagana sa mga flood control projects sa Bulacan.
Sa iyang gipatawag nga press conference kagahapon, gipadayag niini nga ang maong pondo, wala sa House version sa General Appropriations Act (GAA) apan mitumaw human sa bicameral conference committee kon Bicam kansa nagpasabot nga kini gi-insert sa Senate version o kaha sa bicam mismo ug dili na usab masubay kung kinsa nga pulitiko ang nag-insert niini.
Lima ka mga proyekto matud pa ang gi-award na ubos sa maong alokasyon. Ang insertion gi-validate human sa alegasyon ni Engr Brice Hernandez, kanhi assistant engineer sa Department of Public Works and Highways kon DPWH Bulacan, nga si Senador Jinggoy Estrada matud pa ang nagmaneho sa maong alokasyon uban sa alegasyon nga adunay 30% nga kickback kansa daling gipanghimakak sa senador.
Isip pagtahod sa inter-parliamentary courtesy, posibleng makighinabi una si Lacson kang kanhi Senadora Grace Poe, nga kanhi nangulo kaniadtu sa Senate Committee on Finance, arun sayron kung kinsa ang proponent sa maong budget.
Ang pamahayag ni Senador Ping Lacson. Magpadayon ang imbestigasyon sa Senate Blue Ribbon Committee nga gipangulohan ni Lacson, aron masuta ang tinuod nga proponent sa maong insertion kansa nagdala og dakong pangutana sa transparency ug accountability sa proseso sa budget allocation.
