BUTUAN CITY – Nagpagawas na usab og pamahayag si kanhi Senador Antonio Trillanes IV nga posibleng magpagawas usab ang International Criminal Court (ICC) og arrest warrant batok kang Senador Christopher “Bong” Go.
Sumala ni Trillanes, apil si Go sa mga dugay nang gi-imbestigahan sa international tribunal tungod sa iya matud pang papel sa dugu-ong drug war ni kanhi Pangulong Rodrigo Duterte.
Dugang pa sa kanhi senador, interesado ang ICC sa mga “most responsible” sa nahitabo nga drug war. Posible matud pang upat ka arrest warrants ang ipagawas sa ICC, lakip na ang napagawas batok kang kanhi Pangulong Duterte.
Usa niini alang kang Senador Ronald Dela Rosa, nga maoy hepe sa Philippine National Police (PNP) kaniadto samtang ang usa alang usab kang kanhi usab PNP chief retired Gen. Oscar Albayalde ug ang alang kang Sen. Bong Go, nga nagsilbi kaniadtong Special Assistant to the President ubos sa administrasyon ni Duterte.
Dugang pa ni Trillanes, posibleng sa sunod tuig na ipagawas ang arrest warrant.
